алдамшы позиция

(Ложная позиция)

жалған және шын фортификациялық құрылыстармен (ор, окоп, жүріс жолдары, қатынас), атыс құралдары мен әскери техника (зеңбіректер, ракеталар, танктер, соғыс машиналары, т.б.) макеттерімен жабдықталған және арнайы бөлінген бөлімше әрекеттерімен шынайыландырылатын позиция. А.п-лар қарсыласты әскерлер орналасқан позицияның шын орнына қатысты есебінен жаңылыстыру және оның атысын, авиациялық және ракеталық соққыларын шын объектілерден бұру мақсатында жасалады. Елестететін техника мен құрылыстардың пішіні, өлшемі, саны бойынша жалған позицияны шын позицияға ұқсатып жасайды. А.п-лар қорғаныстағы әскерлердің ұрыс ретінің әр түрлі элементтерін елестету үшін қызмет етеді (мыс., екінші эшелондардың, резервтердің, артиллерияның және т.б. жалған позициялары). А.п-ларды шынайыландыру үшін бөлінген бөлімшелер ұрыс қимылдарын елестетеді: атысады, макеттердің, атыс құралдары мен әскери техниканың орнын өзгертеді, инженерлік жұмыстар жасайды, жылжуды және басқа қозғалыстарды жүзеге асырады.